Borghildur Guðmundsdóttir er fædd árið 1968 í Reykjavík en á ættir að rekja til Bolungarvíkur og til Reykjarfjarðar á Hornströndum.

Hún stundaði listanám sitt í Myndlistaskóla Akureyrar, fagurlistadeild, árin 2006-2010.  Áður hafði hún menntað sig sem snyrtifræðimeistari og förðunarmeirstari og starfað við það í mörg ár áður en hún hóf listnám.  Eftir útskrift úr listnámi 2010 hefur hún eingöngu starfað við fagurlist.

Borghildur hefur verið búsett á Akureyri frá árinu 2002.  Þar áður bjó hún á Sauðárkróki í mörg ár, í húsi alveg niður við sjóinn með óhindrað útsýni út Skagafjörðinn og Drangey í allri sinni dýrð.  Sem barn var hún í Reykjafirði á Hornströndum þar sem hún fékk náttúruna einnig beint í æð, allt frá mikilli þoku  yfir í ægifagurt sólarlag við sjóndeildarhringinn.  Þetta hefur mótað hana sem listamann og hefur hún nær alfarið einbeitt sér að landslagi í málverkum sínum.  Í náttúrutúlkun Borghildar má sjá seiðandi andrúmsloft og fallega stemmningu, hvort sem hún túlkar hafið eða hálendið.

Borghildur hefur tekið þátt í mörgum samsýningum og haldið nokkrar einkasýningar. Hún er meðlimur í SÍM, Sambandi íslenskra myndlistamanna , og Myndlistafélagi Akureyrar en hún sat einnig í stjórn þess félags í nokkur ár.

Vinnustofa Borghildar er við smábátahöfnina á Akureyri,  Óseyri 18.